DESHTO RANG

(O intrego, sigo kasaveske kerdyol palpale, sar ando oxtoto rang sas. O Adam, pale sar o Kepler, palaj mesaja dichol, o Lucifer, sar o Famulus, phashaleste tordyol, haj pe lesko phik malavel. E detehara surrol.)

LUCIFER
Pala kado a korshinipe asholtar. -

ADAM (opre ushtyindos)
O, kaj som, kaj si mure sune?

LUCIFER
Hurajletar, la zangarasa, majstori.

ADAM
Ande kado choro phurikano brekk,
Feri e zangar kerel taj baripe?
Ta shukar dikhipe si e jakhenge!
Korroj kon e Develski jag chi hatyarel.
Te sas, ratesa, taj puvasa makhli.
Ta buhato sas leski bezex taj e zor,
Taj sol duj sosko dikhimasko.
Ke e zor, pizdas peles somno. -
Ah, sostar ushtyilom? krujal te dikhav,
Te hatyarav kaj vramako xurdipe.
Tela mosura, garadyi bezex
Taj sikle xoxamne zuralipesa. -

LUCIFER
Pinzharav me kaj pishtyipe,
Savo andej zangar najisil andre.

EVA (avri ushtyades andaj drakha)
Zha anglama - chi xoxavel man,
Opre tromas te ashavesma
Pej kasavi ruto butyi, pattyamnake patyas,
Kas tye jileske shukariposke xoxaves.

O VATRAKO
Anda Del, hodinasa, muri skumpo.
Sama te lena, inke bida keres.

ADAM
Taj vi kodol duj zhuvja suno sas?
Ta so vorbil, jek zhuvlyi, pa duj trupo,
Kaver san, ande moro trajosko agoripe,
Sar e spuma, savo akanak abjol.

EVA
Ah, tuke e chingar majbari butyij,
So molas tuke bezex, andej garady,
Tu bi chingaresko vityazi! -
Ahaj, tume kattyi prassan la zhuvja,
Ke si te shudel pesko suncipe,
Taj mukeles, pestar, atunchi,
Tele dikhipeski assasa dikhenla,
Tumara bezexaki rutojimasa. -
Zha mandar, zha, tena dikhavtu majbut.

O VATRAKO
Kado pale baripe. Prass avasa
Kasave bare dyesa
Ande kadal sakodyesa. - Ame dikhas
Vi pala kadi, assandos taj barimasa,
Taj pakodo, so pecipe, vorba nahatyaras
Lashi detehara, romnye. - (Zhaltar.)

EVA
      O prikezhime!
Eta, kathe sim mure bezexasa, mure asvenca.
(Zhaltar.)

ADAM
Ta numa suno sas, taj agor si.
Ta na sogodeske. E buzhe zuralej.
Kathar o nasul materi. Kado tele pizdel
E sila, taj biagor trajila.
Barimaske dikhav mure sunci buzhe,
Uzhes taj patyivales.
Sar lokhes ande pheren e luma.

LUCIFER
O dyes zhal, majstori, zhukarel o chaso,
O ternipe aba bihodinakoj, kidenpe,
Anda tyo platnikipe mukhes jekh alav.
(O cherhajalo o cino klopoto malavel.)

ADAM
Na prassav man, e zhanimasa,
Trubuj te lazhav kana lasharenma.

LUCIFER
Chi sityares bute lashe shaven?

ADAM
Chi sityarav feri phenav lenge,
La vorbasa, so chi hatyaren,
Taj najle godyi, kako taj kuko te keren
O, bisityardo dikhel, haj kodo gindij.
Kaj shukara vorbasa buzhen anas,
Numa astaripej kado,
Sharavas e jakhengo dikhipe.
(Jekh sityardo, sidyardes zhal po gradicho.)

SITYARDO
Lasho san kaj akhardan man majstori,
Kaj phendan ke muro doro pheres,
Mukes te dikhas andal butya milnes
Ke o kaver maj lasheske inkres.

ADAM
Chaches, chaches, tyo sityipej lashoj,
Kaj po anglunipe angluno san.

SITYARDO
Eta kathe som muro dyi izdral
Andre te dikhav, ande sogodeste.
Opre te xutyilav sogodi lasho
Trajimo ando anglunipe
Ande materija ande buzhengi luma.

ADAM
But doros. Cini san ande luma
Te dikhes perdal sogodi? -
Rajimo manges taj zhanimo.
Chi pherlas khetane tyiro brekk
Kado sa te resesas, Devlikano avesas.
Maj cerra doron, shaj ke reses les.

SITYARDO
Shaj putres e garady e zhanimaske
Bare manusha, me feri lichojme avo.
Ke xatyarav, khanchi chi xutyilav opre.

ADAM
Mishtoj, dikhav tu molestu,
Andre ingrav tut andej garady
Dikh o chachimo sar me dikhav man
Apol chi avla kasavo ashundo, ke
O chachimo baroj, mulikanoj
Te zhala mashkar le manusha andej luma
Maj avla vrama, oh, tavlas kathe
Ke pe vulici vorbina
Ba atunchi chi e manusha chavna cine
Akanak de vast ke chi purlis man
So hatyares. - Kade - ashun.

SITYARDO
Sar izdrav kathar o doro taj kathar e dar.

ADAM
So phendan majintig muro shavo?

SITYARDO
Kodo ke khanchi chi xutyilav opre.

ADAM (samalines)
Ta dikhes, chi me - pattya mange khonyik kaver
O platnikipe feri poezipe
Kodolenge pa soste naj amen gindo
Mashkar le but sityimata o majlashoj inke
Ke feri ande pest gilabel lokhes
Mashkar ande godyi khudo luma
Ke but kasave amala si
Kaj chache mosa ramoj ando praho
O jekh balvalyake phenel
Suntoneske o oblo, ke aba assas
Po khelimo sar ande dikhes
Sosko gindoski bida intrego
Ke kikide brekkesa taj izdramnes
Krujil sogodi o praxome ramope
Katka kutka tromando
Kon perdal ushtyavel, ratvales peravel
Kasavo unyi tordyol binach
Ande amaro drom suntone ashtyinasa
Ferome o barimo.

SITYARDO
Ahaj hatyarav tut, kade avla biagor?

ADAM
Jokhar assana pe sogodeste
E bare murshes, kas bareske phendam
Po ortodokso dikhen
Khelimaske dikhenles e teharutne
Kana o chacho barimo ushtyavel ando than
O chacho taj a lumako
Kaj kothe xuttyavel kaj gropa si
Kothe mukhel drom kaj baroj o kimpo
E sity kaj akanak kaj o dilimo ingrel
Peske xudesa atunchi
Chi sityola khonyik, sogodi xatyarel.

SITYARDO
Kadi shib kaj hatyarimoj
Kaj vorbinas e rashaja
Apol te si sogodi kaver
Na le mandar o teatro
Kodo te sityuvav trubuj.

ADAM
E teatroske majbaro lashimo
Kade te garadyol te na lasles sama.

SITYARDO
Haj kaj a shudro chachimo te tordyuvav?
Buzhe den dyih andel butya.

ADAM
Chaches, chaches kodo shorel opre buzhe
La lumasa, savesa jekh si
Kereles taj zhuvindeske shol les
Ke bikodo feri mulikano kerimoj
Kathar kodo na inker te buzhares
Avri xutyiles po baro trajimo
E patyiv mukh te hodini
Ande kast zor taj Del beshel
Kodo vorbija, ramola, vaj gilyabela
Kana lesko dyi mukhela jilesa rovel
Assav kana andej zangar sovel
Ta ke nyevo drom phagel
Anda peski materija kerel nyevipe
Pharimaske, ba na phakenge,
Ekhe pikkone fircijake chikana.

SITYARDO
Oh so te kerav, majstori phen mange
Kon kattyi ratya dom kothe e zhanimaske
Numa e dilesa som jekh
Taj e butyi xasajlas kade?

ADAM
Chi xasajlas ke kado del krisi,
Aba te shos tele sogodi.
Kon chi dikhlas inke ande xasarake jakha
Kodo bitromakoj. O zumado vityazi
Tromasa nakhel e kecitores
Kaj o tromipe chi resel vorba
Xutyil kado galbeno hertija
Pe hertija muchedo beshel
Shude pe jag sa, kadal bristaven
Amare phurengo phirimo
Taj avri lename anda gindo.
Kadal ingren, but shela bershengi dosh
Bi chachimo ande nyevi luma
Pe jag lenca! Taj avri ando slobodo
Sostar te sityos ke soj e gilyi
Kana o vesh taj o trajo shordyoltar
Pasha biloshako zido
Lungoneske dikhes o trajo,
Kaj zhi kaj tyo mulimo sityos?
Kethane phenas agor la shkolake.
Tut te ingrel luludyaslo ternyipo
Loshamno khameski raza taj gilyi.
Man ingrel tu, godyako buzho
Andej nyevi luma savi bari avla
Kana jekhe bare manusheski godyi hatyarla
Kaj slobodo alav dela e garade gindoske
Tele perade prikezhime armajengo praho.


VisszaKezdőlapElőre