(Jivesa taj pahosa sharado plajickothan, bi kashtengo kimpi. O kham sar lolo, bi razako oblo, tordyol mashkar e muglya. Daba si fimlalipe. Po placo unyi manush murel, mashkar le bur le eskimovengi kolyibica. O Adam sar phuro mirano, rovjasa avel tele pal plaja le Luciferesa.)
ADAM
So phiras pe kaj biagoreski
Jivluma, kaj merimo dikhel pe
Ame, shuvshe jakhenca, numa jek -
Jek zhivo del ando paji, sar
Darajvel amendar, kaj vi e char
Aba rucindas te zhuvel, shuko
Bur mishkil mashkar e bruma,
Taj o shonit lole mosa dikhel
Palaj mugja, sar mulikani lampa,
Ando murmunto. - Kothe inger man
Kaj bulhe patrenge kasht luludyaren
Ande khameski, sungango them, kaj
E manushesko dyih, barilas. -
LUCIFER
Kothe sam. Kado ratoblo tyo kham si.
Tela punrej la phuvako dopash. -
O zhanipe nas maj zuralo sandar.
ADAM
Ruto luma! - numa merimoj lashoj.
Chi sunoj, so kathe mukav,
Ah, Lucifer! kon jokhar kothe tordyuvos
Kaj e manushesko pato, kon dikhlas
Sosko shukarimo mishkil andeleste,
Kon katyi chingar perdal mardom,
Pe kaj baro murmunto, pe savo kalo
Colo shudas e vrama, sar gindijma,
Angluno, paluno manush pe luma:
Fajas man te zhanav, sar pelastar
Muri fircija? Patyivales, shukares,
Prikezhimes, tele cinyardes,
Bi barimo taj pe asva na mollindes.
LUCIFER
Ah, ah, barimango te san pe tyo
Baro buzho, so aba anavdes, kade
Fajtut kodi zor, savi o rat pizdel,
Taj terno kolyin, anda buzhe shuvjarel:
Na doron te tordyos sar chachardo
Kaj tyo mulikano pato. - Kaj chaso,
Perdal dikhel sogodi, e bi butya.
Le tate trabi, nashaven sa le
Trajosko abdyome dikhimaton,
Apol kon zhanel savo sas chacho.
O agoruno zurineski dukh
Baro prassape ande amaro trajo.
ADAM
Ta sostar chi xasajlom po uchipe,
Mura zorasa, duhoske intrego
Hatyarasa, sar kade te ashunav,
Me, mro mulikano lil, so
Ek shudro buzho inkrel, kon ande
Maripe, mulipe, na ulavel manca -
LUCIFER
Pale pe tyi fircija pinzharav sig,
Pasha kaste trazostu
Anda tye skumpi gindura.
Ba, hodintu, ke trajil tyi fircija.
Dikh, vi kothe tordyol ek manushani
Zolba, taj lesko gornyik, avri ushtyavel. -
(Jekh eskimovo andaj kolyiba avri ushtyvel, zhivos te astarel ando pa-ji.)
ADAM
Kado avlas, kado ruto mosko,
Kon ade muro baripe ushtyavel?
Sostar muklan te dikhav, Lucifer!
E hodin maj nasuli, sar e briga.
O ESKIMO
Ta trajin, le Devla, opral pamende?
Eta anglama kerdyile.
Dapol, kon zhanel, nasulaj vaj lashej,
Shavma lendar, kodoj o maj mishto.
(Palpale kamel te zhal.)
LUCIFER
Tordyuv, pe ek vorba!
O ESKIMO (pe changa)
Jertosar, raja!
La angluna zhivoja tuke postil,
Numa ashun man, taj na rumun man.
LUCIFER
Ta kaj kodi zhivija, so grizha
Si tut, ka lake trajosa, muntus tut?
O ESKIMO
Sostar xavla: ke dikhav krujal mande,
Sar xal e kermes o masho, e mashes
E zhivij, la zhivija pale me.
LUCIFER
Taj o baro buzho tusa xal.
O ESKIMO
Zhanav, zhanav, ba e cini vrama,
Ande soste mukel te mishkijma,
Kinavles ratvale postyinasa.
ADAM
Che bi tromako dikhipe!
LUCIFER
Ta tu kaver keresas?
Kodoj numa o kaver mashkar tume,
Hoj voj zhivija, tu manushes postis
Le Devlenge, so kerdan pe tyiri
Mosura, sar kado pe pesko.
O ESKIMO
Dikhav xojajves, taj hatyarav sostar.
Ande mro choripe kaj tromajlom
Dyih te lav, kaj le dyesesko Del, kon
Chi mangel, numa del, kon dulmut vi
Kathe vladijas jokhar. - Oh, jertosar,
Taj armaj davles, sakana.
ADAM
Eta, baro Del,
Dikh tele taj petyuv, che prikezhimej,
Kas mishto kerdan, le manushes!
O ESKIMO
Bares xojajvel tyo amal, bokhaloj?
[LUCIFER]
ADAM
Sostar phenes khancheske trabi!
LUCIFER
Chachimoj kodo, ke na khancheskimoj.
Tyo godyarimo e chaleskoj, ba kathe
Tye amales, bokhalo perreski
Filozofaj. Doshasa jekhavres chi
Hatyaren, dapol hatyarna tume,
Kana tu bokhajvesa, vaj voj te
Chajola. Ova, ova, shaj gindistu,
Sakana o pedoj angluno ande
Tumende, haj kana kado zhanena
Te asharen, godyate del o manush,
Taj phutyardes shudel, so anglunuj leske. -
ADAM
Kasavij tyi vorba, sar tu, Lucifer,
Kon, sako suntos, cirdes ando praho.
Ta sako baro buzho, shukar
Kerdyimoj, numaj kindako paraj,
Vaj kasavo choro sumboroj, so
O nasul materijako unyi krisi
Mishkil, taj inkrel tele phangles? -
LUCIFER
Ta si aversar? - ta kodo gindis,
Hoj Leonidas merel ando kikido,
Te xalino anda galbeno zumi
Ade kasavo republika, kaj chi
Love naj, Lucullushi dyiz, pel
Peski gugli zang? Vaj o
Brutus mulosas, te gelosas
Khere kaj e shukar Porcija, taj
O maripe avri hodisajlo pala
Lasho xaben? sar barol e bezex,
Haj o rajimo? Na zhug, chorojimo
Aneles pe luma, na khameski raza,
Slobodijako hatyar, perdal ingrel
Pes ando trupo, taj buzho?
Sode zhene phende ke ginade
Penca, taj opre phanglepe pe ek
Kasht. Dapol tele te linele
Strena vasta, o trajo nyevo hatyar,
Bristraven lenca o bezexipe. -
Ta o baro Hunyad tena avilo
Ande pesko nepeto pej luma, te
Prikezhime cerha tavilo pelesko
Pato: so avilo angluno vityazi
Trushules? Vaj o Luther, te avlo
Taj o Leo sityari, rashaj, pe
Nyamcicko univerzita:
Kon zhanel, na kako nyevarel,
Taj koko phenel armaj po tromako?
So avla Napoleon, te lesko phutyar
Drom na ek nepetosko rat vortarel?
Kernyilo andek ketanijako kher.
ADAM (Luciferesko muj adre xutyildes)
Na majbut! sa, so phenes,
Kasave jekheske dichol, chacheske:
Dapol maj bezex si. - E paramicha
Numa e koles korrarel, kon chi
Kade chi hatyarel e buzhes,
Savo mashkar ame del, mishkil;
Dapol leske phrales opre pinzharlas
O majlasho, tena murdarlas les tyi sity. -
LUCIFER
Vorbin tye amaleske, naj dosh
Ek cino pinzharipe ande tute.
ADAM
But zhene daba trajin pe kimpi?
O ESKIMO
Butzhene, ova, majbut sar mure
Vast le naja. - Chaches, mure
Kovaren sa shereste mardem, dapol
Iva, pale aven nyeve, taj cerrej
E zhivija. Te san Del, ker,
Rudyij tut, tal maj cerra manusha,
Taj majbut zhiviji. -
ADAM
Lucifer, aventar dosta sas!
LUCIFER
Ta dikhas aba leska romnya.
ADAM
Chi kamav te dikhavla, ke te
Pereltar o mursh, jakhenge
Zhungaloj te dikhen:
Taj feri prassav kerdyol and brekk.
E zhuvlij, e trabaj, trupuni poezaj,
Ke te milnij zhungalijla,
Zha tena dikhavla.
(Tela kadi vrama o Lucifer e Adamos karing e kolyiba ingerdas les, akanak o vudar rigate pruntyisarrel, andrej e Eva, sar le Eskimo-veski romnyi dichol. O Adam morcome dikhel, tordyindos kaj o vudar.)
LUCIFER
Chi dikhes andela dulmutana
Pinzharda? Ta dela angalya,
Ke kado patyivalo manush, ciroj
Tena sikavesa patyiv, romnyake.
ADAM
Te angalyav kadala, kon ekh
Aspasia. Kadala te inkrav!
Ande kast dikhav pale koj mosura,
Ba, kade, sar te, mashkar laki chumid,
Pedo kerdyolas. -
O ESKIMO (andej kolyiba ushtyades)
Zhuvjim! Strejna
Resline. Dikh le jilesa.
(E Eva andej Adamoski kor perel, taj andej kolyiba cirdeles.)
EVA
Av, najisime, strenona, hodintu.
ADAM (avricirdelpes)
Zhutinma, Lucifer! zhastar kathar, zhas,
Inger man and tehara, palpale
Ando akanak, tena te dikhav
Muro choro trajo: o iva marimo.
Mukh, gindijma: Te boldav man Develske. -
LUCIFER
Trazontu, Adam, tyo suno nachilas. -