Filippo Buonaccorsi
Attila
CONTENTA, INTRODUCTIO
Contenta
INTRODUCTIO.
I. De vita operibusque Callimachi Experientis
II. De codicibus et editionibus Attilae
CALLIMACHUS EXPERIENS: ATTILA
APPENDIX
SCRIPTURA
ANNOTATIONES CRITICAE
INDEX NOMINUM
CORRIGENDA
Introductio
Vita. Callimachus Experiens (Etruscus: Filippo Buonaccorsi, Philippus Buonaccursius) in oppido Sancto Geminiano die 2. mensis Mai anni 1437. natus est. Eum Florentiae studiis operam dedisse verisimile est; Venetias, mox exeunte regno Pii II. papae Romam Iulium Pomponium Laetum auditum profectus est, quo fratrem natu minorem sequebantur. Ibi in illa celeberrima Academia Cal1imachus summa industria erat, sed coniurationi contra Paulum II. papam factae se immiscuit, qua de causa fugere coactus est. Peragravit oras orientales maris interni: visitavit Siciliam, Cretam, Aegyptum, Rhodum, Cyprum, Chium, Constantinopolim, demum per Valachiam ad propinquum quendam nomine Arnulfum Thedaldium in Poloniam fugit, qui eum apud Gregorium Sanocensem archiepiscopum Leopolianum ei postea magnum patronum et verum amicum introduxit, cuius commendatu a. 1472. educator regulorum iuniorum Ioannis Alberti et Alexandri, a. autem 1474. iam consiliarius regis Poloniae familiarissimus factus est.
...