---

Summarium

PRAEFATIO
ABBREVIATIONES

TABELLAE COMPARATIONI INSERVIENTES
I. Sanctorale Gelasiano-Gregorianum
II. Tab. Patroni dioecesium et capitulorum Hungariae
III. Tab. Festa peculiaria Hungariae
IV. Tab. Festa specialia Ordinis S. Pauli primi eremitae
V. Tab. Specialia in lectionibus missae
VI. Tab. Specialia officii divini
VII. Officia S. Stephani regis
VIII. Tab. Officium S. Ladislai regis
IX. Officia S. Emerici ducis
X. Tab. Officium S. Elisabeth
XI Tab. Psalterium usuale
XII Tab. Praeparatio ad missam
XIII. Tab. Orationes ad indumenta
XIV. Tab. Missa catechumenorum
XV. Tab. Ritus offertorii
XVI. Tab. Ordo in purificatione B. M. V.
XVII. Tab. Ordo in die cinerum
XVIII. Tab. Ordo in ramis palmarum
XIX. Tab. Ordo feriae VI. in parasceve
XX Tab. Ordo in sabbato sancto

I. PARS. LIBRI LITURGICI MANU SCRIPTI AD MISSAM PERTINENTES
1. Sacramentaria
2. Missalia
3. Lectionaria missae

INDEX PERSONARUM
INDEX REALIS

---

Praefatio

De scopo suscepti operis breviter dicturi, monere debemus venerabilem virum Jos. Dankó, olim praepositum Capituli Posoniensis (†1895) iam enuntiasse "deesse librum e quo omnia ad varios Ecclesiae Hungariae ritus spectantia sumere possemus et comparare". Etsi vir memoratus fatebatur, se de eiusmodi libro compilando saepe meditasse, tamen "a suscipiendo huiusmodi grandi et diuturno labore" abstinuit. Opere hoc nostro prima vice praebetur liber, e quo antiqua liturgia Hungariae in monumentis reperta erui potest. Ast insuper in edendo hoc opere aliquantulum pluris nobis proposuimus: una cum codicibus liturgicis originis Hungaricae simul recensemus omnes libros manu scriptos liturgicos cuiuscunque originis, qui in bibliothecis Hungariae reperiuntur. Opus nostrum ergo est catalogus omnium manuscriptorum liturgicorum in Hungaria existentium.

Ut "minimum inchoationis opus" anno 1941 edidimus libellum, de quo scripsimus esse hoc "opusculum praesens tantum initium prodromusque operis maioris, quod Deo favente editurus sum". Opere praesenti maiore volumus tractare huius memorati opusculi primam partem, in isto "Indice" tantum summis apicibus indigitatam: libros liturgicos manu scriptos omnes, qui in bibliothecis actualis Hungariae (1944) ad nostram notitiam pervenerunt. Ut patet, intelligimus manuscripta liturgica medii aevi, quod nostra opinione usque ad tempora concilii Tridentini extendendum est, quod rem liturgicam attinet.

...

Breviter loquentes de executione "technica" publicationis, codices accurate describuntur, eorum materia, formatum, scripturae, species, tempus scriptionis, ligaturae indoles, notantur notae musicae et illuminatura codicis. Deinde secundum necessitatem plus-minus breviter adiicimus inquisitionem criticam manuscripti, in qua primo inquirimus de possessoribus actualem antecedentibus, deinde scriptore amanuensi codicis, item de provenientia, seu origine libri, ubi - inquantum inquiri potest - cum regio, tum ecclesia, vel ordo religiosus detegitur codicis; demum allegamus, si quae sint, adnotationes; adiungentes bibliographiam codicis. Post haec tantum sequitur accurata analysis codicis: in qua divisiones et omnes subdivisiones alicuius momenti cum titulo in codice scripto, vel "Incipit" allegantur; argumentum alicuius partis semper numeris foliorum codicis notatur. Textus originales codicis duplici modo signantur, quod in libro Latine scriptum opportunum videtur: et signo citationis: "..." et litteris cursivis, seu Italicis.

Imponamus tandem finem relationi factae de nostra methodo, rationem reddentes de divisione huius operis. Quatuor partes complectitur praesens dilucidat io: Prima parte recensemus codices liturgicos ad missam pertinentes: Sacramentaria - missalia - lectionaria missae. Secunda parte libros liturgicos ad officium chori pertinentes: Psalteria - breviaria - lectionaria chori - et promptuaria, i. e. codices, qui plene non possent haberi libri liturgici, tamen nondum sunt "libri horarum" (livre d'heure) mere usui privato deservientes. Tertia parte complectuntur codices liturgici ad liturgiám sacramentalem pertinentes: Pontificalia, i. e. codices, in quibus primarie functiones pontificales, ut ordinatio, confirmatio, consecrationes tractantur - libri rituales - ordinarii, i. e. libri liturgiam dirigentes, "directoria", seu consuetudines. Quarta parte recensemus codices musicae sacrae, qui sane potuissent etiam in partes antecedentes inseri, tamen cum quoad maiorem partem notas musicas continentes cantui liturgico inserviebant, merito constituunt classem ab aliis separatam. Hic notantur Gradualia i. e. libri cantuales missae inservientes - antiphonaria, i. e. ad officium chori pertinentes - cantionalia, i. e. libri cantui destinati, varii argumenti.

...

---